الحجـــــلة

سألت جدتي شو كنتو تلعبو زمان؟ 

 قالتلي اقعدى تنى اخرفك ياجدتي عن العابنا وصار تحكي قالتلي كنا نلعب الحجلة

 

 

قلتلها كيف كنتو تلعبوها؟

قالت هادي اللعبة ياستي للبنات كنا نختار مكان ونرسم عالارض مربعات كبيرة شوي 

قلتلها كم بنت كنتو؟ قالت بنفعش نكون اقل من تنتين وبالغالب نكون اربع بنات وكنا نجيب قرش ووحدة منا تختار الملك والتانية تختار العشرة ونرميه بالجو واللى بطلع اللى بتختارو هلة تعلب الاول 

كان كل وحدة توخذ حجر والى عليها الدور ترمي الحجر عالارض بالمربع الاول وتصير تزقو برجلها لقدام والرجل التانية مرفوعة عن الارض وهى تحاول تخلي الحجر يقف في المربع الأول بشرط ماتيجي رجلها ع الارض ومايكون الحجر عالخط الفاصل بين المربعين وازا صار هيك بتكون وقعت وخسرت الدور وإجى دور اللى بعدها  

Résuméabuiyad

الحـــايب

 تختلف الألعاب الشعبية التي يتسلى بها الصبية في النهار عن تلك التي يمارسونها في المساء، كما أن ألعاب الفتية تختلف عن ألعاب الفتيات.

في ساعات النهار كان الفتية يمارسون ألعابهم المفضلة في حاراتهم، أو في الساحات القريبة من منازلهم، ومن بين هذه الألعاب لعبة «الحَيّبْ». عدد اللاعبين: اثنين، طريقة اللعب: وهي قطعة خشبية يبلغ طولها نحو خمسة عشر سنتميتراً، مدببة الطرفين، سميكة في الوسط، بحيث لو ضُربت من أحد طرفيها انطلقت في الفضاء.

وتوضع هذه القطعة الخشبية المدببة الطرفين بشكل مستعرض فوق حفرة ضحلة في الأرض لا يزيد عمقها عن بضعة سمنتميترات. وهذه الحفرة تكون مستطيلة الشكل، قد يصل طولها إلي نحو عشرين سنتميتراً. ويطلق الصبية على هذه الحفرة «مور».

ويقوم أحد اللاعبين من الصبية بوضع عصاة في الـ «مور» أسفل القطعة الخشبية المدببة. ويجذب العصا بقوة على إلى أعلى، فتنطلق القطعة الخشبية المدببة في الهواء، حيث يحاول زميل له يقف قبالته ضربها بعصاه، فإن أفلح في ذلك، يقوم بإكمال اللعبة وذلك بأن يضرب على أحد طرفي القطعة الخشبية المدببة بعصاه، فتنطلق إلى أعلى، ثم يلاحقها ليضربها وهي في الهواء، ويظل يداوم على ذلك، فإذا فشل في ضرب القطعة الخشبية في أثناء انطلاقها إلى أعلى، أصبح من حق زميله أن يتسلم اللعبة منه فيبدأ دوره في اللعب.

Résuméabuiyad

حكايات الزواج الفلسطيني

                                                      

جلست جدتي عند  المساء وأخذنا نتسامر سألها أحد اخوتي عن قصة زواجها بدأت جدتي تروي قصة زفافها قائلة : 

أول مانبدى نصلي ع النبي* نبي عربي ركب البراق أول مانبدى نصلي ع النبي المختار* 

لما يجى الشب يتزوج بحكي لامو وامو بتحكي لابوه وبعدين بصير الموضوع  بتدى امو تدور على بنت تناسبه وبس تلاقيها بتروح ع اهلها وبتقول لامها احنا جايين طالبين بنتكم فلانة لابنا فلان شاوروا البنت وابوها واخوتها وبعد يومين باجي اخد الرد وبعد ماالام بتشاور اهل البيت وبتم الموافقة من الطرفين (اهل العريس وأهل العروس) بخبروا قرايبهم واصحابهم وجيرانهم وبخبروهم باليوم اللى حددوا مع بعض وباليوم المحدد

                                                                         

خطوبة جدتي:

وهيك بداية موضوعي ياستي اجت امو لجدك وقالت لامي احنا حابين اناسبكم في بنتكم فلانة لابنا فلان واجت امى سالتنى بعد ماحكت لابوى واخوتى ولما ابوي سال عن جدك واهلو ولقاهم مناسبين ردلهم جواب اهلا وسهلا واتفق مع اهلو لاجدك ع موعد يجيو هم والجاهة تبعيتهم  وفي اليوم اللى اتفقو عليه إجى جدك واهلو والجاهة ونحنا نفس الحاجة اجو قرايبنا واستقبلوهم احسن استقبال بقولهم

(أهلا ويهلا يوم جيتون شرفتم المنازل,

 يوم جيتون أنا لو كنت داري,

 يوم جيتون لزوقت ماعليا لمن الثياب )

فردو عليهم اهل جدك وقالولهم:

يا مساالخير يمسي الحاضرين

يمسيكم بالشمال واليمين 

أنا كرمالكم يالحاضرين عبد مرهون لحين الطلب )

بعدين بدوا بالكلام أهل جدك وقالوا:  والله احنا طالبين القرب في بنتكم المصون لولدنا فلان  واهلى رحبو وقالولهم نتشرف بنسبكم الغالي وفصلو المهر وكان مهري 10 شواكل وحددوا موعد الاخدة (الصمدة)

                                                                     

ليالي الفرح :

ولما إجي موعد الفرح عزموا اهل جدك اهل قريتهم ونحنا كمان نفس الاشي اعملنا عزمنا قرايبنا واهلنا وجيرانا وإجوا كل المعازيم في اليوم الموعود وكانوا أهل جدك مجهزين حطب وشوية خشب ومحضرين  وعاء اسمه (دست او طنجرة كبيرة) ويحطو فيه صرة شاي من قماش أبيض نظيف معلقة بعصاية وبحطو السكر إما قوالب أو رؤوس وبجهزو الشاي ويوزعوه على الحاضرين والشباب يدبكوا ويغني الهم زجال وموسيقار والمجوز وهو (اليرغول) والطبلة والشبابة والرجال الكبار يسامروا ولما بتعبوا بقعدوا وبوزعوا عليهم الشاي والقهوة السادة وبضل السامر يغني 3 ليالي والكل فرحان ويرقص على أغاني (الدلعونة, وزريف الطول, وعتابا, وياغزيل. والروزانة)

                                                                  

الليلة الثالثة من السامر بتكون ليلة الحنة وفيها بتكون الشنيعة مثل المسرحية واجو أهل جدك علينا بالدار  ومعهم قرايبهم وجيرانهم جايبين معهم (سكر -ليمون- ملبس (بيض الحمام)- فول سوادنى -حنة- رز- شعرية- شاي) حاطينهم على سدر كبير مزين بالورد واهلى استقبلوهم استقبال لايق فيهم .

                                                          

                                    

وفي اليوم التاني بعد الظهر تقريبا بجهزوا للزفة إذ يشمي الشباب في المقدمة بعدين العجايز من الرجال (الشيوخ) بعدين العريس راكب ع الفرس مجهز بالسراج واللجام وبسوقها ناطور البلد بعدين النسوان برقصن وبغنن أغاني حلوة مفرحة وبتكون الخيل تتسابق في الخلا والولاد الصغار على ظهور الحمير أما في الصيف كان الشباب يطلعو عالبراري وبضلو يدورو حتى بين العصر والمغرب وبروحوا ع الجرن (البيدر) بلاقي الشباب الفراش والقهوة السادة والشاي وبمرو ع الموجودين ثم تذهب النساء إلي منازلهم وبتكون كل وحدة مجهزة الزاد وبيجن فيه على مكان الحفلة بيهب الشباب كل واحد منهم ياخد من أهل بيتو الزاد اللى جايبيتو ويمدومع الموجودين حتى يخلصو من الأكل وكل واحد بياخد المواعين تبعت اهلو وبردهم لاهلو في هادا الوقت بتكون النسوان تغني

 (عالعيش عالعيش ياحسن ابن سرحان ,

عالعيش عالعيش ياحسن ابن سرحان) ويرقصن الهودلي والولاد الصغار بلعبو وهمة فرحانين أما في الشتا بدور الركب حول القرية وبعدين بروحو ع ضريح الولى بحط العريس فرسه عالضريح وبقرى الفاتحة ع روحه وبعدين برجعو يكملو مسيرتهم لحتى يصلو للمكان المعد للاستقبال وبعدين اجى جدك واهلو عبيتنا وهمة فرحانين ومبسوطين وكنت انا مجلية بأطلس شمالي (وهو ثوب خاص بالعروس ) وكنت راكبة ع الفرس حتى وصلنا بيت الزوجية والمعازيم روحو كل واحد ع بيتو وماضل حدا غير اهلى واهل جدك وبعدين انا وجدك فتنا ع بيتنا (غرفة الزوجية) وبالرفاه والبنين وكانو أهلى جايبين معهم عشا العرسان (حمام أو زغاليل).

صباحية جدتي:-

تاني يوم الفرح (الصباحية) إجو أهلى جايبين مطبق بالسمسم (فطير) والزيت والزيتون والعسل , وسلمو أهلى على أهل جدك واتبادلو التباريك والتهاني وكل واحد راح في حال سبيله.

وهاى حكيات زواجي يا جدتي وسلامة تسلمكم .

Résuméabuiyad